𝗗𝗿𝗲𝗮𝗺 𝗰𝗮𝘁𝗰𝗵𝗲𝗿 Sinhala

 𝗗𝗿𝗲𝗮𝗺 𝗰𝗮𝘁𝗰𝗵𝗲𝗿 🕯

සිහින පෙරණය නැත්තම් විලෝ වළලු නිර්මාණයේ ඉතිහාස කතාව මොකක් දපාදක වෙන්නේ අමෙරිකානු ස්වදේශික ජනතාව අතර පැතිර තිබූ පුරාවෘත්තයක්📜

ඒ පුරාවෘත්තයන්ට අනුව ක්‍රිස්ටෝපර් කොලොම්බස් අමෙරිකාව සොයා ගැනීමට බොහෝ කාලයකට කලින් එහි මුල් වැසියන් කණ්ඩායමක් වූ 'Ojibwa' ඔජිබ්වා මිනිසුන් අතර සිටි එක් ආධ්‍යාත්මික නායකයෙක්. ඔහු දිනක් කඳු මුදුනක සිටින විට ඉක්තෝමි නම් වූ තවත් ප්‍රඥාවන්තයකු මුණගැසුණා. ඉක්තෝමි පෙනීසිටියේ පාද අටක් සහිත මකුළුවකුගේ වේශයෙන්. ඇතැම් පුරාවෘත්තවල හැටියට නම් ඒ කාන්තාවක් කියලා තමයි කියන්නෙ. කෙසේ වෙතත් මේ දෙදෙනා අතර ලෝකයේ හොඳ නරක පිළිබඳ ව ගැඹුරු සංවාදයක් ඇති වුණා.

🔖(" මේ පුරාණ කතාන්දරයට අනුව මකුළුවා, ලෝකය චක්‍රයක් බවත් උපතේ සිට මරණය දක්වා සියලු දෙනාගේ ජීවිත චක්‍රාකාර ව ගත වන බවත් පවසා තිබෙනවා. මේ ඔජිබ්වා ජනතාව අතර ස්වභාවික ප්‍රඥාව උතුම් දෙයක් වශයෙන් සැලකුණු අතර ම ඔවුන් ස්වභාවිකත්වය තමන්ගේ මඟ පෙන්වන ගුරුවරයා බවට විශ්වාස කළා. ")

ඒ කතබහ සිදුවෙන අතරතුරේදී ඉක්තෝමි, ආධ්‍යාත්මික නායකයා සතු ව තිබුණු පිහාටු,අශ්ව කෙඳි, පබළු සහ විලෝ වළල්ලක් ආදී ඔවුන්ගේ පූජා භාණ්ඩවලින් දැලක් වියන්නට පටන්ගෙන තිබෙනවා. බොහෝ දීර්ඝ ව සිදුවුණු මේ සංවාදය තුළ දී මේ විවීම නතර නොවී දිගින් දිගට ම සිදු වී තිබෙනවා. කතාව අවසානයේ දී ඉතා අලංකාරවත් ලෙස වියා තිබුණු ඒ විලෝ වළල්ලේ අත්කම් මෝස්තරය ඔහු ඔජිබ්වා ආධ්‍යාත්මික නායකයා වෙත ප්‍රදානය කළ බවයි පැවසෙන්නේ. එතැන් පටන් මේ ස්වදේශික අමෙරිකානුවන් අතර සුබ සිහින ඇල්ලීමේ හා නරක සිහින විනාශ කිරීමේ සම්ප්‍රදාය ආරම්භ වෙන්නෙ🙂☯️....

විලෝ වළලු වලින් සංකේතවත් වෙන්නෙ මොන වගේ දේවල් ද??🧐

• සූර්යයාගේ ශක්තිය සංකේතවත් කිරීම 💫

ඩ්‍රීම් කැචර් එකක හරි මැදින් සිදුරක් තියනවා නේඩ😌. මේ සිදුර තමයි සූර්යයාගේ ශක්තිය සංකේතවත් කරන්නෙ. ඒ සිදුර තුළින් රාත්‍රී වාතයේ ඇති සුබ සිහින ඇදී ඇවිත් සුවපත් නින්දක් ලබා දෙන බව ස්වදේශික අමෙරිකානුවන්ගේ විශ්වාසයක්. ඒ වගේ ම සුව නින්දට බාධා කරන නරක සිහින, මෙහි තිබෙන දැල්වල පැටලී අතරමං වී උදෑසන හිරු එළිය පායන විට ඉන් විනාශ වන බවත් ඔවුන් විශ්වාස කළා. මේ කාලයේදී සැරසිල්ලක් විදියට ඩ්‍රීම් කැචර්ස් හැමතැන ම එල්ලුවත්, සම්ප්‍රදාය නම් එය තමන් නිදන ඇඳට ඉහළින් එල්ලීම බව බොහෝ දෙනකු නොදන්නවාට සැකයක් නැහැ.  

• ජීවන ජාලයේ නිර්මාතෘවරයා 🀄

මුල් ම යුගයේ දී ඩ්‍රීම් කැචර්ස් නිර්මාණය කර තිබෙන්නේ රතු විලෝ අතු කැබලි සහ ශාක කෙඳි භාවිත කරමින්. එයට අමතර ව කුරුළු පිහාටු, බෙලි කටු, ඊතල හිස් වගේ ම ඇතැම් විට වටිනාකමෙන් මඳක් අඩු මැණික් ගල් පවා භාවිත කර තිබෙනවා. ඒ සඳහා මැණික් ගල් භාවිත කරන සෑම විට ම එක් නිර්මාණයක් වෙනුවෙන් එක් මැණික් ගලක් පමණක් යොදා ගෙන ඇත්තේ මේ ජීවන ජාලයේ නිර්මාතෘවරයා සිහිපත් කිරීම වෙනුවෙන්.

• ප්‍රඥාවන්ත මකුළුවාගේ පාද අට 🌙

සාම්ප්‍රදායික ඩ්‍රීම් කැචර්වල වටේ පිහිටි වළල්ල දැළට සම්බන්ධ වන ස්ථාන තිබී ඇත්තේ අටක් පමණයි. එයට හේතුව වී ඇත්තේ මේ නිර්මාණය ලොවට දුන් ප්‍රඥාවන්ත මකුළුවාගේ පාද අට සිහිවීම පිණිස ලු.😶

 

📎" බොහෝ කාලයකට පෙර අමෙරිකාව ආක්‍රමණය කළ ක්‍රිස්ටෝපර් කොලොම්බස් පරපුරේ මිනිසුන් මේ ස්වදේශික ජනතාවට නිදහසේ ඉන්නට ඉඩ ලබා දුන්නේ නැහැ. ඔවුන් ස්වදේශිකයන්ගේ ආගමික විශ්වාස හා ඇදහිලි පවා තහනම් කළා. ඒ කාලයේ දී ඇතැම් ආගමික සංකේත සැලකුණේ නීති විරෝධී තහනම් දේවල් විදියට. ඒ අනුව මේ සිහින අල්ලන අපූරු නිර්මාණයත් තහනම් භාණ්ඩයක් වී තිබෙනවා. නමුත් 1978 දී අමෙරිකානු - ඉන්දියානු ආගමික නිදහස් පනත තුළින් මේ තහනම ඉවත්කරන්නට කටයුතු යෙදීමත් සමඟ ඩ්‍රීම් කැචර්ස් සම්ප්‍රදාය ලෝකය පුරා ව්‍යාප්ත වන්නට පටන් ගත්තා. "

අද වන විට මේ අපූරු ඩ්‍රීම් කැචර් එක බොහෝ දුර ගමනක් ඇවිත්. රෙදි හා රිබන් වැනි විවිධ දේවල් යොදා ගනිමින් විවිධ ආකාරයේ ගෙත්තම්වලින් මේ කාලයේ ඩ්‍රීම් කැචර්ස් නිර්මාණය වුවත් එහි ඇතැම් සාම්ප්‍රදායික ලක්ෂණ අදටත් නොනැසී පවතිනවා. එය එහි මුල් අරමුණ වන සිහින ඇල්ලීමේ කටයුත්තෙන් බැහැර වී හුදෙක් ම සැරසිල්ලක් ලෙසින් පෙනී සිටිනවා. එහි මුල් කතන්දරයත්, ඒ හා බැඳුණු සංස්කෘතියත් නොදන්නා නමුත් ස්වදේශික අමෙරිකානුවන්ගේ මේ අපූරු නිර්මාණය අදටත් සිතේ හා අවට පරිසරයේ ශාන්තිමත් භාවය අගය කරන්නන්ගේ සංකේතයක් බවට පත්වී තිබීම සතුටට කරුණක්. ඉතිං නින්දට යද්දි ඇස් ඉස්සරහා සුලගට නටන වර්ණවත් පිහාටු වලට ඇත්තටම අපේ හිත් සැහැල්ලු කරන්න පුළුවන්..........🪶

Sources -

: winterandsparrow.com

: fsutorch.com

#SARVEGA #Dream_catcher